અમદાવાદના 79 કિમી લાંબા SP રિંગ રોડના 6-લેનિંગનું 20% કામ પૂર્ણ

અમદાવાદ: Built India Media: અમદાવાદના ટ્રાફિકનું ભારણ ઘટાડવા માટે સરદાર પટેલ (SP) રિંગ રોડને ચાર લેનમાંથી છ લેનમાં ફેરવવાના ₹2,200 કરોડના પ્રોજેક્ટનું 20% કામ પૂર્ણ થયું છે. AUDA દ્વારા હાથ ધરાયેલા આ પ્રોજેક્ટને આગામી બે વર્ષમાં પૂર્ણ કરવાનું લક્ષ્ય રાખવામાં આવ્યું છે.
79 કિમી લાંબો આ રિંગ રોડ દરરોજ આશરે એક લાખ વાહનોની અવરજવર સંભાળે છે. તે ઉત્તર ગુજરાત, મધ્ય ગુજરાત અને સૌરાષ્ટ્રને જોડવાની સાથે 6 નેશનલ હાઇવે અને 11 સ્ટેટ હાઇવે સાથે કનેક્ટિવિટી પૂરી પાડે છે.

પ્રોજેક્ટ હેઠળ મુખ્ય માર્ગમાં બે વધારાની લેન ઉમેરવામાં આવશે, જ્યારે સર્વિસ રોડને ઉપલબ્ધ જગ્યા મુજબ ત્રણથી ચાર લેન સુધી પહોળા કરાશે. ભાટ, ચિલોડા અને અસલાલી સર્કલ પર અંડરપાસ, તેમજ કામોદ અને ભાટ ખાતે સાબરમતી નદી પર ત્રણ લેનના બ્રિજ બનાવવાનું આયોજન છે. આ ઉપરાંત ટ્રાગડ અને નિકોલના ભક્તિ સર્કલ પાસે પણ અંડરપાસ બનાવવામાં આવશે.
પ્રોજેક્ટમાં વરસાદી પાણીનો સંગ્રહ, ભૂગર્ભ જળ રિચાર્જ, વૃક્ષારોપણ, સોલાર પેનલ અને પ્લાસ્ટિક વેસ્ટનો રોડ નિર્માણમાં ઉપયોગ જેવી પર્યાવરણલક્ષી વ્યવસ્થાઓનો પણ સમાવેશ થાય છે. સાથે ધૂળ નિયંત્રણ અને અવાજ ઘટાડવા માટે નોઇઝ બેરિયર પણ બનાવવામાં આવશે.
ટીમ બિલ્ટ ઈન્ડિયા | સૌજન્ય: દેશગુજરાત



