ગુજરાત રેન્ટ બિલ 2026: ભાડાની ડિપોઝિટ હવે 3 મહિનાના ભાડા સુધી મર્યાદિત થશે
અમદાવાદ:Built India Media: ગુજરાત સરકાર નવા રેન્ટ બિલ દ્વારા ભાડા વ્યવસ્થામાં મોટા ફેરફારની તૈયારી કરી રહી છે. બિલમાં સુરક્ષા ડિપોઝિટ મહત્તમ 3 મહિનાના ભાડા સુધી મર્યાદિત કરવા અને લેખિત ભાડા કરાર ફરજિયાત કરવાની જોગવાઈ છે.
મકાનમાલિક અને ભાડૂતના હકો-જવાબદારીઓ સ્પષ્ટ કરવામાં આવશે. આવશ્યક સેવાઓ બંધ કરવા પર નિયંત્રણ રહેશે અને મકાનમાં પ્રવેશતા પહેલાં 24 કલાકની લેખિત નોટિસ આપવી પડશે.
ભાડું ન ચૂકવવું, ગેરકાયદે પેટાભાડે આપવું અથવા મિલકતનો દુરુપયોગ કરવા જેવા કિસ્સામાં મકાનમાલિકને મિલકત ખાલી કરાવવાનો માર્ગ મળશે. કુદરતી આફતથી મિલકત રહેવા યોગ્ય ન રહે તો ભાડૂતને ચોક્કસ રાહતની જોગવાઈ પણ છે.
વિવાદોના ઝડપી ઉકેલ માટે ભાડા સત્તામંડળ, ભાડા અદાલત અને ટ્રિબ્યુનલની વ્યવસ્થા કરવામાં આવશે. નવા કાયદાથી 1947ના જૂના ભાડા નિયંત્રણ કાયદાને બદલીને વધુ વ્યવસ્થિત ભાડા વ્યવસ્થા લાવવાનો પ્રસ્તાવ છે.
ટીમ બિલ્ટ ઈન્ડિયા | સૌજન્ય: દેશગુજરાત
