કોમનવેલ્થ ગેમ્સ 2030 માટે ગુજરાતનો રૂ. 40,000 કરોડનો ઇન્ફ્રાસ્ટ્રક્ચર વિકાસ પ્લાન

અમદાવાદ: Built India Media: વર્ષ 2030માં યોજાનારી કોમનવેલ્થ ગેમ્સને ધ્યાનમાં રાખીને અમદાવાદમાં માળખાગત સુવિધાઓના વિકાસને વેગ આપવામાં આવી રહ્યો છે. છેલ્લા એક સપ્તાહમાં રમતગમત, પરિવહન અને શહેરી વિકાસનાં વિવિધ પ્રોજેક્ટ માટે આશરે રૂ. 40,000 કરોડનાં ટેન્ડર બહાર પાડવામાં આવ્યાં છે.

મુખ્ય પ્રોજેક્ટમાં સરદાર વલ્લભભાઈ પટેલ (SVP) સ્પોર્ટ્સ એન્ક્લેવ ખાતે નવું એક્વેટિક સ્ટેડિયમ, કરાઈ ખાતે સ્પોર્ટ્સ કોમ્પ્લેક્સ, મેટ્રો રેલનો ત્રીજો તબક્કો અને સિંધુ ભવન રોડ પર આઇકોનિક સિટી સ્ક્વેરનો સમાવેશ થાય છે. SVP એક્વેટિક સ્ટેડિયમના પ્રથમ પેકેજ માટે રૂ. 2,800 કરોડ અને કરાઈ સ્પોર્ટ્સ કોમ્પ્લેક્સ માટે રૂ. 1,450 કરોડનાં ટેન્ડર બહાર પાડવામાં આવ્યાં છે.

પરિવહન ક્ષેત્રે મેટ્રો ફેઝ-3 અને પ્રસ્તાવિત મેટ્રો રિંગ માટે રૂ. 17,801 કરોડનાં ટેન્ડર બહાર પાડવામાં આવ્યાં છે. આ ઉપરાંત અમદાવાદ-ધોલેરા રેપિડ રિજનલ ટ્રેન સિસ્ટમ માટે રેલવે દ્વારા રૂ. 18,900 કરોડનાં ટેન્ડર બહાર પાડવામાં આવ્યાં છે. આ પ્રોજેક્ટ્સથી અમદાવાદ અને આસપાસના વિસ્તારોની કનેક્ટિવિટી વધુ મજબૂત બનશે.

સિંધુ ભવન રોડ પર રૂ. 570 કરોડના ખર્ચે આઇકોનિક સિટી સ્ક્વેર બનાવવાનું આયોજન છે. તેમાં 175 મીટર ઊંચો ટાવર, ગ્લાસ સ્કાયવોક, વ્યૂઇંગ ગેલેરી, સ્કાય ડેક, રેસ્ટોરાં, ફૂડ કોર્ટ, એમ્ફિથિયેટર, આર્ટ ગેલેરી, પબ્લિક પ્લાઝા, મલ્ટીલેવલ ભૂગર્ભ પાર્કિંગ અને આશરે 50 રિટેલ તથા કોમર્શિયલ યુનિટ બનાવવામાં આવશે.

ટીમ બિલ્ટ ઈન્ડિયા | સૌજન્ય: અમદાવાદ મિરર