બનાસકાંઠામાં PM મોદીએ રૂ. 14,000 કરોડથી વધુનાં વિકાસકાર્યોનું લોકાર્પણ કર્યું

બનાસકાંઠા: Built India Media: વડાપ્રધાન નરેન્દ્ર મોદીએ ગુજરાતની મુલાકાત દરમિયાન બનાસકાંઠામાં રૂ. 14,000 કરોડથી વધુનાં વિવિધ વિકાસકાર્યોનું લોકાર્પણ, ખાતમુહૂર્ત અને રાષ્ટ્રને સમર્પણ કર્યું હતું. આ પ્રોજેક્ટ્સમાં પશુપાલન, કૃષિ, ફૂડ પ્રોસેસિંગ, સ્ટોરેજ અને ગ્રામ્ય માળખાકીય સુવિધાઓ સાથે જોડાયેલી યોજનાઓનો સમાવેશ થાય છે.

ભીલડી ખાતે 127 એકરમાં વિકસાવવામાં આવેલા ભારત બોવાઇન બ્રીડિંગ એન્ડ રિસર્ચ સેન્ટર (BBBRC)નું લોકાર્પણ કરવામાં આવ્યું હતું. આશરે રૂ. 324.77 કરોડના ખર્ચે તૈયાર થયેલું આ કેન્દ્ર કાંકરેજ સહિતની સ્વદેશી પશુઓની ઓલાદ સુધારવા અને આધુનિક પ્રજનન ટેક્નોલોજીને પ્રોત્સાહન આપવા માટે મહત્ત્વપૂર્ણ સાબિત થશે.

આ ઉપરાંત, સનાદર ખાતે રૂ. 51.65 કરોડના ખર્ચે તૈયાર થયેલા બટાકા પ્રોસેસિંગ પ્લાન્ટના વિસ્તરણનું લોકાર્પણ કરવામાં આવ્યું હતું. પાલનપુરમાં રૂ. 31.14 કરોડના ખર્ચે સ્થાપિત બનાસ ડેરીની UHT પ્રોડક્ટ્સ માટેની ઓટોમેટેડ સ્ટોરેજ એન્ડ રિટ્રીવલ સિસ્ટમ (ASRS) પણ કાર્યરત કરવામાં આવી હતી.

કૃષિ ઇન્ફ્રાસ્ટ્રક્ચર ફંડ હેઠળ આશરે રૂ. 4,950 કરોડના કુલ પ્રોજેક્ટ ખર્ચે પૂર્ણ થયેલા 521 પ્રોજેક્ટ્સ રાષ્ટ્રને સમર્પિત કરવામાં આવ્યા હતા. તેમાં કોલ્ડ સ્ટોરેજ, વેરહાઉસ, સિલો, ગ્રીનહાઉસ અને ફૂડ પ્રોસેસિંગ સુવિધાઓનો સમાવેશ થાય છે. આ ઉપરાંત ગુજરાતમાં પૂર્ણ થયેલા 361 બાળમૈત્રી આંગણવાડી કેન્દ્રોનું પણ લોકાર્પણ કરવામાં આવ્યું હતું.

ટીમ બિલ્ટ ઈન્ડિયા