વડોદરામાં ₹10 લાખથી વધુના વિકાસકાર્યોની થર્ડ પાર્ટી તપાસ કરાશે

વડોદરા: Built India Media: વડોદરા મ્યુનિસિપલ કોર્પોરેશન (VMC) દ્વારા ₹10 લાખથી વધુ ખર્ચના વિકાસકાર્યોમાં ફરજિયાત થર્ડ પાર્ટી ઈન્સ્પેક્શન કરાવવાનો પ્રસ્તાવ મૂકવામાં આવ્યો છે. તેનો હેતુ કામની ગુણવત્તા અને નિર્ધારિત ધોરણોનું પાલન સુનિશ્ચિત કરવાનો છે.

આ પ્રસ્તાવને VMCની જનરલ બોર્ડની મંજૂરી માટે રજૂ કરવામાં આવ્યો છે અને શનિવારે મળનારી બેઠકમાં અંતિમ નિર્ણય લેવાય તેવી શક્યતા છે. મ્યુનિસિપલ કમિશનરને કેન્દ્ર અથવા રાજ્ય સરકારની એજન્સીઓ મારફતે કામોની તપાસ કરાવવાની સત્તા આપવાની જોગવાઈ છે.

VMC દ્વારા પાણી પુરવઠો, ડ્રેનેજ, સ્ટોર્મ વોટર ડ્રેનેજ, રોડ, RCC રોડ, પેવર બ્લોક, સિવિલ વર્ક અને સ્ટ્રીટ લાઈટિંગ સહિતના અનેક કામો ખાનગી કોન્ટ્રાક્ટરો મારફતે કરાવવામાં આવે છે.

થર્ડ પાર્ટી ઈન્સ્પેક્શનથી કામના ટેક્નિકલ સ્પેસિફિકેશન, ગુણવત્તા ધોરણો અને સરકારી યોજનાઓ હેઠળ મળતી ગ્રાન્ટની શરતોનું પાલન થાય છે કે નહીં તેની ચકાસણી કરવામાં આવશે. વધુ એજન્સીઓને પેનલમાં સામેલ કરવા નવી E-1.0 ભાવ-ક્વોટેશન મંગાવી શકાશે અને નવી એજન્સીઓની નિમણૂક થાય ત્યાં સુધી હાલની એજન્સીઓની સેવા ચાલુ રાખી શકાશે.

ટીમ બિલ્ટ ઈન્ડિયા | સૌજન્ય: દેશગુજરાત