પશ્ચિમ એશિયા સંકટને કારણે સરકારી પ્રોજેક્ટોની સમયમર્યાદા વધારાઈ છે કે નહીં, વિચારણા હેઠળ-ગુજરેરા

ગુજરાત રિયલ એસ્ટેટ રેગ્યુલેટરી ઓથોરિટી (GujRERA)એ પશ્ચિમ એશિયામાં ચાલી રહેલા સંકટની અસરને ધ્યાનમાં રાખીને રાજ્યના માર્ગ અને મકાન (R&B) વિભાગને પત્ર લખી પૂછ્યું છે કે શું રાજ્ય સરકારના કોઈ સિવિલ વર્ક્સ પ્રોજેક્ટોની સમયમર્યાદામાં વધારો કરવામાં આવ્યો છે કે નહીં. સૂત્રોના જણાવ્યા મુજબ, રિયલ એસ્ટેટ ક્ષેત્રની સંસ્થાઓ દ્વારા ચાલુ પ્રોજેક્ટોને છ મહિનાનું એક્સટેન્શન આપવા માટે સતત રજૂઆતો કરવામાં આવી રહી છે.

સૂત્રોના જણાવ્યા અનુસાર, ગુજરેરા કોઈ નિર્ણય લેતા પહેલાં રાજ્ય સરકારના કોન્ટ્રાક્ટિંગ માળખામાં આવા કોઈ પૂર્વ દાખલા છે કે નહીં તેની તપાસ કરી રહી છે. એક ગુજરેરા અધિકારીએ જણાવ્યું કે કેન્દ્ર સરકારે “ફોર્સ મેજ્યોર” (અણધાર્યા સંજોગો)નો હવાલો આપીને વિવિધ પ્રોજેક્ટોની પૂર્ણાહુતિ સમયમર્યાદામાં બે થી ચાર મહિનાનો વધારો કર્યો છે, પરંતુ કોઈ રાજ્ય રેરા દ્વારા આવી સમયમર્યાદા વધારવાનો દાખલો ઉપલબ્ધ નથી.

અધિકારીએ વધુમાં જણાવ્યું કે આ મુદ્દે વધુ માહિતી મેળવવા માટે R&B વિભાગ પાસેથી વિગતો મંગાવવામાં આવી છે. ગુજરેરા હાલમાં આ પરિસ્થિતિ “ફોર્સ મેજ્યોર” હેઠળ તમામ પ્રોજેક્ટોને એકસાથે રાહત આપવા યોગ્ય છે કે નહીં તે અંગે વિચારણા કરી રહી છે.

તે દરમિયાન, અમદાવાદ ક્રેડાઈ (CREDAI Ahmedabad)એ રિયલ એસ્ટેટ (નિયમન અને વિકાસ) અધિનિયમની કલમ-6 હેઠળ ચાલુ રહેલા પ્રોજેક્ટોને છ મહિનાનું એક્સટેન્શન આપવા માટે ગુજરેરાને સત્તાવાર રજૂઆત કરી છે. ક્રેડાઈએ જણાવ્યું છે કે પશ્ચિમ એશિયા સંકટને કારણે કાચા માલના પુરવઠામાં વિક્ષેપ, મજૂરોની અછત અને બાંધકામ સામગ્રીના ભાવોમાં ભારે વધારો થયો છે, જેના કારણે અનેક પ્રોજેક્ટો સમયસર પૂર્ણ થવામાં મુશ્કેલીનો સામનો કરી રહ્યા છે.

ક્રેડાઈના જણાવ્યા મુજબ, ક્રૂડ ઓઈલ આધારિત બાંધકામ સામગ્રીની ઉપલબ્ધતા પર અસર પડી છે અને ખરીદી પ્રક્રિયામાં વિલંબ સર્જાયો છે. પરિણામે, પ્રોજેક્ટોના અમલીકરણના સમયપત્રક જાળવવા મુશ્કેલ બન્યા છે. સંસ્થાએ ચેતવણી આપી છે કે આ વિલંબ નવા પ્રોજેક્ટ લોન્ચ પર પણ અસર કરી શકે છે અને સમગ્ર બજારમાં બાંધકામ પ્રવૃત્તિ ધીમી પડી શકે છે.

વધુમાં ક્રેડાઈએ સિમેન્ટ, સ્ટીલ, ટાઇલ્સ, એલ્યુમિનિયમ, પીવીસી પાઈપ, પેઇન્ટ, રેડી-મિક્સ કૉન્ક્રિટ, સિમેન્ટ બ્લોક્સ અને વોટરપ્રૂફિંગ સામગ્રી સહિત વિવિધ બાંધકામ સામગ્રીના ભાવોમાં 30 થી 60 ટકા સુધીના વધારાનો ઉલ્લેખ કર્યો છે. સંસ્થાના મતે, આ ભાવવધારાને કારણે કુલ પ્રોજેક્ટ ખર્ચમાં 10 થી 20 ટકા સુધીનો વધારો થયો છે, જેના કારણે પ્રોજેક્ટ રજિસ્ટ્રેશન સમયે બનાવવામાં આવેલા બજેટ અને નાણાકીય આયોજન પર અસર પડી છે.

ક્રેડાઈએ દલીલ કરી છે કે આ પરિસ્થિતિ ડેવલપર્સના નિયંત્રણ બહારની છે અને તેથી “ફોર્સ મેજ્યોર” જોગવાઈઓ હેઠળ યોગ્ય રાહત આપવી જોઈએ.

ટીમ બિલ્ટ ઈન્ડિયા.