મિલકત ખરીદ-વેચાણના દસ્તાવેજો ફેસલેસ થશે, રાજ્યનું મહેસૂલ વિભાગ કરી રહ્યું છે તૈયારીઓ
ગુજરાતમાં મિલકત ખરીદ-વેચાણના દસ્તાવેજો ફેસલેસ કરવામાં આવશે. ગુજરાત સરકારના મહેસૂલ વિભાગે જમીન અને મિલકતોના દસ્તાવજોની નોંધણી પ્રક્રિયાને સંપૂર્ણપણે ફેસલેસ બનાવવાની દિશામાં મક્કમ પગલાં હાથ ધર્યા છે. સબ-રજિસ્ટાર કચેરીમાં થતો વચેટીયાઓનો ત્રાસ, વ્યાપક ભ્રષ્ટાચાર અને સમયનો વિલંબ અટકાવવા માટે ટેકનોલોજીના માધ્યમથી આ નવી વ્યવસ્થા આગામી દિવસોમાં અમલી બનાવવા માટેની ગતિવિધિ હાથ ધરવામાં આવી છે.
મહેસૂલ વિભાગના સૂત્રોના જણાવ્યાનુસાર, બ્લોકચેન ટેક્નોલોજીનો ઉપયોગ કરીને, ખરીદ-વેચાણના દસ્તાવેજો ફેસલેસ બનાવવામાં આવશે. આ પદ્ધતિમાં બ્લોકચેન ટેક્નોલોજી સફળ હોવાથી તેનો ઉપયોગ દસ્તાવેજ ફેસલેસ કરવામાં વપરાશે તેમ મહેસૂલ વિભાગના સૂત્રો જણાવે છે.
નવી સિસ્ટમ મુજબ પગલે નાગરિકોએ દસ્તાવેજ કરવા માટે સબ-રજિસ્ટ્રાર કચેરીએ રુબરુ જઈને કલાકો સુધી લાઈનમાં ઉભા રહેવું નહી પડે. જોકે, આ પ્રોજેક્ટ રાજ્ય સરકાર પ્રાથમિક તબક્કે ચોક્કસ મોટા શહેરોમાં પાયલોટ પ્રોજક્ટ તરીકે શરુ કરી શકે છે.
અમદાવાદના અમુક વિસ્તાર પુરતી પ્રાયોગિક ધોરણે તેનો અમલ કરવામાં આવે. આ પછી તેની સફળતા અને ટેકનિકલ સદ્દવ્યવહારની ચકાસણી કર્યા બાદ, તેને સમગ્ર ગુજરાતમાં ફરજિયાત કરવામાં આવી શકે તેમ મહેસૂલ વિભાગના સૂત્રોએ જણાવ્યું છે.
નોંધનીય છે કે, રાજ્ય સરકાર દ્વારા આ વ્યવસ્થાને સુપેરે પાર પાડવા માટે બ્લોકચેન ટેક્નોલોજીનો ઉપયોગ કરવામાં આવશે. જેમાં ડેટા એન્ક્રિપ્ટેડ ફોર્મેટમાં હોય છે. જ્યાં સુધી દસ્તાવેજ ફાઈનલ મંજૂર ન થાય, ત્યાં સુધી કોઈપણ કોમ્યુટર કે હેકર પણ ખરીદનાર-વેચનારનું અસલી નામ જોઈ શકતા નથી. દસ્તાવેજની તમામ બાબતો ચકાસણી થઈ ગયા, પછી છેલ્લા ખરીદનાર કે વેચનારની એળખ છતી કરાશે.
ટીમ બિલ્ટ ઈન્ડિયા.
