25 વર્ષનો જનસેવાનો સફર: ગુજરાતથી રાષ્ટ્રનિર્માણ સુધી PM નરેન્દ્રભાઈ મોદીની યાત્રા
ગાંધીનગર: Built India Media: 7 ઓક્ટોબર 2001ના રોજ નરેન્દ્રભાઈ મોદીએ ગુજરાતના મુખ્યમંત્રી તરીકે શપથ લીધા હતા. તે સમયે ભૂકંપ બાદ ગુજરાત સામે લોકોનો વિશ્વાસ પુનઃસ્થાપિત કરવાનો મોટો પડકાર હતો. તેમના નેતૃત્વમાં રોડ, વીજળી, પાણી, શિક્ષણ, કૃષિ અને ઉદ્યોગ સહિતના ક્ષેત્રોમાં વિકાસને વેગ મળ્યો અને વહીવટી વ્યવસ્થામાં પણ નવા અભિગમ અપનાવવામાં આવ્યા.
શાળા પ્રવેશોત્સવથી ગુણોત્સવ, કૃષિ મહોત્સવથી પશુ આરોગ્ય મેળા, ખેલ મહાકુંભથી વાઈબ્રન્ટ ગુજરાત સુધીની પહેલો દ્વારા વિકાસમાં જનભાગીદારી વધારવાનો પ્રયાસ થયો. ટેક્નોલોજીના ઉપયોગથી સુશાસનને મજબૂત બનાવાયું અને ‘SWAGAT’ જેવી પહેલ દ્વારા નાગરિકોને સરકાર સમક્ષ પોતાની ફરિયાદો રજૂ કરવાની સીધી વ્યવસ્થા મળી. 2001થી 2014 દરમિયાન ગુજરાતના વિકાસ માટેનો પંચામૃત અભિગમ—જનશક્તિ, જળશક્તિ, જ્ઞાનશક્તિ, ઊર્જાશક્તિ અને રક્ષાશક્તિ મહત્વપૂર્ણ આધાર બન્યો.
2014માં નરેન્દ્રભાઈ મોદી વડાપ્રધાન બન્યા બાદ ગુજરાતમાં અમલમાં આવેલી જનકેન્દ્રિત વિકાસની વિચારધારાને રાષ્ટ્રીય સ્તરે વિસ્તારવામાં આવી. સ્વચ્છ ભારત, નલ સે જલ, પ્રધાનમંત્રી જન આરોગ્ય યોજના અને ખેલો ઈન્ડિયા જેવી પહેલો દ્વારા આરોગ્ય, સ્વચ્છતા, પાણી અને રમતગમતને રાષ્ટ્રીય વિકાસના કેન્દ્રમાં સ્થાન મળ્યું. 2014થી 2026 દરમિયાન અર્થતંત્ર, ઈન્ફ્રાસ્ટ્રક્ચર, રેલવે, બંદરો, ઉડ્ડયન, સંરક્ષણ અને ડિજિટલ ઈન્ફ્રાસ્ટ્રક્ચરમાં પ્રગતિ સાથે આત્મનિર્ભર ભારતને મહત્વ આપવામાં આવ્યું.
ગુજરાત માટે આ 25 વર્ષના વિકાસ પ્રવાસમાં અમદાવાદ-ધોલેરા સેમી-હાઈસ્પીડ રેલ કોરિડોર, અમદાવાદ-ધોલેરા એક્સપ્રેસવે, GIFT Cityમાં કર લાભો, ₹35,200 કરોડથી વધુના વિકાસ પ્રોજેક્ટ્સ, ખાવડા રિન્યુએબલ એનર્જી પાર્ક, સેમિકન્ડક્ટર પ્રોજેક્ટ્સ, PM MITRA પાર્ક, બલ્ક ડ્રગ પાર્ક, નરેન્દ્ર મોદી સ્ટેડિયમ અને દાહોદ રેલવે મેન્યુફેક્ચરિંગ યુનિટ જેવા મોટા પ્રોજેક્ટ્સનો સમાવેશ થાય છે.
25 વર્ષની આ સફરમાં 13 વર્ષ ગુજરાતના મુખ્યમંત્રી અને 12 વર્ષ ભારતના વડાપ્રધાન તરીકેની જવાબદારીનો સમાવેશ થાય છે. ગુજરાતથી શરૂ થયેલી વિકાસયાત્રા હવે ‘વિકસિત ભારત @2047’ના સંકલ્પ સાથે રાષ્ટ્રનિર્માણની વિશાળ યાત્રા તરફ આગળ વધી રહી છે.
ટીમ બિલ્ટ ઈન્ડિયા | સૌજન્ય: દેશગુજરાત
