સાબરમતી રિવરફ્રન્ટ પર 940 મીટરનો સ્ટ્રેચ બનશે ફેમિલી એન્ટરટેઇનમેન્ટ ઝોન
અમદાવાદ: Built India Media: સાબરમતી રિવરફ્રન્ટના પશ્ચિમ કિનારે સરદાર પટેલ બ્રિજથી અટલ બ્રિજ સુધીના 940 મીટરના વિસ્તારમાં આધુનિક મનોરંજન ઝોન વિકસાવવાની યોજના છે. સાબરમતી રિવરફ્રન્ટ ડેવલપમેન્ટ કોર્પોરેશન લિમિટેડ (SRFDCL) દ્વારા આ વિસ્તારના આયોજન અને સંચાલન માટે માસ્ટર એજન્સીની નિમણૂક કરવા EOI મંગાવવામાં આવી છે. પ્રોજેક્ટ બે વર્ષમાં પૂર્ણ કરવાનો લક્ષ્યાંક છે.
આ ઝોનમાં વોલ અને જમીન પર પ્રોજેક્શન શો, 3D હોલોગ્રામ, લાઇવ મ્યુઝિક, ગરબા અને વિવિધ મનોરંજન પ્રવૃત્તિઓ યોજાશે. 515 મીટરના પ્રથમ વિભાગમાં સાંજે 7:30થી રાત્રે 11:30 વાગ્યા સુધી લાઇટ એન્ડ પ્રોજેક્શન શો યોજાશે, જેમાં અમદાવાદના ઇતિહાસ અને યુનેસ્કો વર્લ્ડ હેરિટેજ શહેર તરીકેની ઓળખ દર્શાવવામાં આવશે.
બીજા વિભાગમાં 3D હોલોગ્રામ રૂમ, થીમ આધારિત મિની શો અને ફોટો પોઇન્ટ બનાવાશે. જ્યારે સરદાર પટેલ બ્રિજ નીચેના ત્રીજા વિભાગમાં ટેબલ ટેનિસ, ફુસબોલ, સ્નૂકર અને બાસ્કેટબોલ જેવી રમતો માટે સ્પોર્ટ્સ હબ વિકસાવવામાં આવશે. અહીં સામુદાયિક ટુર્નામેન્ટ અને વિશાળ ફ્લોર ગેમ્સનું પણ આયોજન થશે.
આ ઝોનમાં વર્ષના ઓછામાં ઓછા 10% દિવસો સામાન્ય જનતા માટે વિનામૂલ્યે ખુલ્લા રાખવામાં આવશે, જ્યારે 15% ઇવેન્ટમાં સ્થાનિક કલાકારો અને સમુદાયોને તક અપાશે. પૂર અંગેની ચેતવણી મળ્યાના 24થી 36 કલાકમાં તમામ અસ્થાયી માળખાં દૂર કરવાની જોગવાઈ પણ રાખવામાં આવી છે. ઇમરજન્સી વાહનોની અવરજવર માટે રિવરફ્રન્ટનો માર્ગ હંમેશાં ખુલ્લો રહેશે.
ટીમ બિલ્ટ ઈન્ડિયા | સૌજન્ય: ટાઈમ્સ ઓફ ઈન્ડિયા
