ગુજરાતના રિયલ એસ્ટેટમાં લોન્ચિંગની ગતિ ધીમી, દિવાળી બાદ તેજીની આશા

અમદાવાદ: Built India Media: બાંધકામ સામગ્રીના ભાવ અને બદલાતી ડિમાન્ડને કારણે ગુજરાતના રિયલ એસ્ટેટ માર્કેટમાં નવા પ્રોજેક્ટ લોન્ચિંગની ગતિ થોડી ધીમી પડી છે. એપ્રિલથી સપ્ટેમ્બર 2026 દરમિયાન GujRERAમાં 756 નવા પ્રોજેક્ટ નોંધાયા, જે અગાઉના બે વર્ષની સરખામણીએ સાવચેતીભર્યું વલણ દર્શાવે છે.

આ સમયગાળામાં અમદાવાદ 217 પ્રોજેક્ટ સાથે પ્રથમ ક્રમે, સુરત 180, વડોદરા 81 અને ગાંધીનગર 71 પ્રોજેક્ટ સાથે આગળ રહ્યા. ભવનગરે 59 નવા પ્રોજેક્ટ સાથે રાજકોટને પાછળ છોડી દીધું, જ્યારે રાજકોટમાં 41 પ્રોજેક્ટ નોંધાયા.

અમદાવાદમાં જાન્યુઆરીથી સપ્ટેમ્બર દરમિયાન 14,300 ઘરોનું વેચાણ થયું, જે વાર્ષિક ધોરણે 2% વધુ છે. ₹1 કરોડથી વધુ કિંમતના ઘરોના વેચાણમાં 16%નો વધારો થયો છે, જ્યારે શહેરમાં અનસોલ્ડ ઈન્વેન્ટરી 9% વધીને આશરે 38,700 યુનિટ થઈ છે.

ડેવલપર્સના મતે જમીન અને કાચા માલના વધેલા ખર્ચથી માર્જિન પર અસર પડી છે. જોકે દિવાળી બાદ નવા પ્રોજેક્ટ લોન્ચિંગમાં તેજી આવવાની આશા છે. વૈષ્ણોદેવી, છારોડી-ગોટા અને ઝુંડાલ જેવા વિસ્તારોમાં અફોર્ડેબલ હાઉસિંગ અને 3-BHKની માંગ વધવાની શક્યતા છે, જ્યારે મેટ્રો કનેક્ટિવિટી ધરાવતા વિસ્તારોમાં કોમર્શિયલ રિયલ એસ્ટેટની માંગ પણ વધી રહી છે.

ટીમ બિલ્ટ ઈન્ડિયા | સૌજન્ય: ટાઈમ્સ ઓફ ઈન્ડિયા