સાબરમતી રિવરફ્રન્ટની મલ્ટીલેવલ પાર્કિંગની છત પર રૂફટોપ રેસ્ટોરન્ટ-કેફે બનશે

અમદાવાદ: સાબરમતી રિવરફ્રન્ટ ડેવલપમેન્ટ કોર્પોરેશન લિમિટેડ (SRFDCL) દ્વારા પશ્ચિમ કાંઠે આવેલી મલ્ટીલેવલ પાર્કિંગની છત પર પ્રીમિયમ ફાઇન-ડાઇનિંગ રેસ્ટોરન્ટ અને કેફે વિકસાવવાની યોજના બનાવવામાં આવી છે.

આ માટે SRFDCLએ રેસ્ટોરન્ટ અને કેફેના વિકાસ, સંચાલન અને મેનેજમેન્ટ માટે રસ ધરાવતા બિડર્સ પાસેથી EOI મંગાવ્યા છે. પ્રસ્તાવ રજૂ કરવાની છેલ્લી તારીખ 1 સપ્ટેમ્બર નક્કી કરવામાં આવી છે.

આ ₹60 કરોડના સાત માળના મલ્ટીલેવલ પાર્કિંગને સપ્ટેમ્બર 2023માં ટ્રાયલ ધોરણે શરૂ કરવામાં આવ્યું હતું. અહીં આશરે 1,000 ટુ-વ્હીલર અને 700 ફોર-વ્હીલર પાર્ક કરવાની સુવિધા છે.

પાર્કિંગની નીચે લીઝ પર આપવામાં આવેલી 16 દુકાનોમાંથી છેલ્લા ત્રણ વર્ષ દરમિયાન અપેક્ષા મુજબ આવક ન મળતાં, SRFDCL હવે રૂફટોપ રેસ્ટોરન્ટ અને કેફેના માધ્યમથી વધુ આવક ઊભી કરવાની આશા રાખી રહ્યું છે.

ટીમ બિલ્ટ ઇન્ડિયા , સૌજન્ય: દેશગુજરાત