GIFT સિટી સંયુક્ત રાષ્ટ્ર દ્વારા માન્યતા મેળવનાર ભારતનું પ્રથમ અર્બન રેઝિલિયન્સ હબ બન્યું

ગાંધીનગર: Built India Media: ગુજરાતની GIFT સિટીને સંયુક્ત રાષ્ટ્રની ડિઝાસ્ટર રિસ્ક રિડક્શન કચેરી (UNDRR) દ્વારા ‘રેઝિલિયન્સ હબ’ તરીકે માન્યતા આપવામાં આવી છે. આ સાથે GIFT સિટી ભારતનું પ્રથમ શહેરી કેન્દ્ર બન્યું છે, જેને UNના ‘મેકિંગ સિટીઝ રેઝિલિયન્ટ 2030’ (MCR2030) અભિયાન હેઠળ આ માન્યતા મળી છે. ભૂકંપ, આગ અને અન્ય આપત્તિઓ સામેની તેની તૈયારીઓની નોંધ લેવામાં આવી છે.
GIFT સિટીએ જુલાઈ 2022માં આ પહેલમાં જોડાયા બાદ રેઝિલિયન્સ રોડમેપના પ્રથમ બે તબક્કા પૂર્ણ કર્યા છે અને માર્ચ 2024માં તૈયાર કરાયેલી રેઝિલિયન્સ એક્શન પ્લાનનો અમલ કરી રહી છે. શહેરમાં આપત્તિ વ્યવસ્થાપન યોજનાઓ, ઇમરજન્સી રિસ્પોન્સ સિસ્ટમ, વહેલી ચેતવણીની વ્યવસ્થા અને 15થી વધુ મોક ડ્રિલ હાથ ધરવામાં આવી છે.

આ ઉપરાંત, શહેરમાં 36થી વધુ પ્રકારનાં ઇમરજન્સી સાધનોનો સંગ્રહ રાખવામાં આવ્યો છે. હવામાન વિભાગની આગાહી, NDMAના સચેત પ્લેટફોર્મના એલર્ટ અને ભૂકંપની માહિતીના આધારે વહેલી ચેતવણીની વ્યવસ્થા કાર્યરત છે. GIFT સિટી હવે આ અનુભવ દેશ-વિદેશનાં અન્ય શહેરો સાથે પણ વહેંચશે.
હાલમાં GIFT સિટી આશરે 4.05 ચોરસ કિમી વિસ્તારમાં ફેલાયેલી છે, જેને 13 ચોરસ કિમીથી વધુ વિસ્તાર સુધી વિકસાવવાની યોજના છે. અહીં આશરે 2,500 લોકો રહે છે અને 28,000થી વધુ લોકો કાર્યરત છે. આ માન્યતા શહેરના આયોજનમાં આપત્તિ સામેની તૈયારી અને જોખમ વ્યવસ્થાપનને વધુ મહત્ત્વ આપશે.
ટીમ બિલ્ટ ઈન્ડિયા | સૌજન્ય: ટાઈમ્સ ઓફ ઈન્ડિયા



