અમિત શાહ ગુજરાતમાં, પરિવાર સાથે ઊજવશે જન્માષ્ટમી

ગૃહ અને સહકાર મંત્રી અમિત શાહ ગુરુવારે રાતે અમદાવાદ આવી પહોંચ્યા હતા. તેઓ જન્માષ્ટમીનો તહેવાર અમદાવાદમાં પરિવાર સાથે ઊજવશે. ટૂંકા રોકાણ દરમિયાન ગાંધીનગર મતક્ષેત્રમાં તેઓ ‘ગાંધીનગર લોકસભા- હરિયાળી લોકસભા’ અભિયાનને આગળ વધારશે. જન્માષ્ટમીના વિસે કલોલ પાસેના નારદીપુર ગામમાં આકાર પામી રહેલા નક્ષત્ર વનમાં ગૃહમંત્રી અમિત શાહ વૃક્ષારોપણની શરૂઆત કરાવશે. ગાંધીનગરના સાંસદ તરીકે પોતાના મતક્ષેત્રમાં નારદીપુર ગામથી તેઓ એક પરિવારને એક વૃક્ષ ઉછેરવાના સંકલ્પ દ્વારા તેઓ દરેક ગામમાં ઉપરોક્ત અભિયાને આગળ વધારવા સ્થાનિક કાર્યકરો, જનપ્રતિનિધિઓ અને સંસ્થાઓનું માર્ગદર્શન પૂરું પાડી ઉત્સાહ વધારશે. શ્રી કૃષ્ણ જન્મોત્સવ નિમિત્તે તેઓ વસ્ત્રાપુરમાં આવેલા વૈષ્ણવ હવેલીમાં દર્શનાર્થે જાય તેવી શક્યતાઓ પણ વ્યક્ત થઈ રહી છે. દરવર્ષે જન્માષ્ટમીએ પરિવાર સાથે તેમનો આ ક્રમ રહ્યો છે. આ સિવાય શુક્રવારે તેમના કોઇ કાર્યક્રમો નિર્ધારિત થયા નથી તેમ ગાંધીનગર લોકસભા કાર્યાલયમાંથી જાણવા મળ્યું હતું. જન્માષ્ટમી બાદ ગૃહમંત્રી અમિત શાહ શનિવારની સવારે દિલ્હી જશે.

ટીમ બિલ્ટ ઈન્ડિયા, સૌજન્ય- સંદેશ.