વડોદરા-રતલામ ત્રીજી-ચોથી રેલવે લાઇન માટે 800 હેક્ટર જમીન સંપાદન
વડોદરા: Built India Media: વડોદરા-ગોધરા-રતલામ વચ્ચેની 259 કિમી લાંબી રેલવે લાઇન પર ત્રીજી અને ચોથી લાઇન નાખવા માટે ₹8,885 કરોડના પ્રોજેક્ટનું ખાતમુહૂર્ત કરવામાં આવ્યું છે. આ પ્રોજેક્ટથી રેલવે ટ્રાફિકનું ભારણ ઘટશે અને ભવિષ્યમાં ટ્રેનની ઝડપ વધારવામાં મદદ મળશે.
પ્રોજેક્ટ માટે ગુજરાત અને મધ્યપ્રદેશમાં કુલ આશરે 800 હેક્ટર જમીન સંપાદિત કરવામાં આવશે. તેમાં લગભગ 350 હેક્ટર ખાનગી, 225 હેક્ટર સરકારી અને 228 હેક્ટર વન જમીનનો સમાવેશ થાય છે. ગુજરાતમાં વડોદરા, પંચમહાલ અને દાહોદ તથા મધ્યપ્રદેશમાં રતલામ અને ઝાબુઆ જિલ્લામાંથી લાઇન પસાર થશે.
નવી લાઇનમાં એક ડિગ્રીથી વધુનો કોઈ વળાંક નહીં હોય, જેથી ભવિષ્યમાં 160 કિમી પ્રતિ કલાક સુધીની ઝડપે ટ્રેન દોડાવી શકાય. હાલ આ રૂટ પર ટ્રેનો આશરે 100થી 130 કિમી પ્રતિ કલાકની ઝડપે દોડે છે. આ વધારાની લાઇનો વ્યસ્ત દિલ્હી-મુંબઈ રેલ રૂટ પરનું દબાણ પણ ઘટાડશે.
આ પ્રોજેક્ટથી માલગાડીઓ અને સુપરફાસ્ટ-એક્સપ્રેસ ટ્રેનોનું સંચાલન વધુ સરળ બનશે અને ક્ષમતા તથા સમયપાલનમાં સુધારો થશે. ગુજરાતના ઔદ્યોગિક વિસ્તારોને મધ્યપ્રદેશના માલવા અને આદિવાસી વિસ્તારો સાથે વધુ સારી લોજિસ્ટિક કનેક્ટિવિટી મળશે. પ્રોજેક્ટ માટે વીજળીના પોલ અને હાઈ-લો વોલ્ટેજ લાઇનોનું સ્થળાંતર પણ કરવામાં આવશે, જેના માટે ₹6.63 કરોડનું ટેન્ડર બહાર પાડવામાં આવ્યું છે.
ટીમ બિલ્ટ ઈન્ડિયા | સૌજન્ય: દેશગુજરાત
