AUDAની 16 પ્લોટની મેગા હરાજી, ₹1,415 કરોડથી વધુની બેઝ વેલ્યુ

અમદાવાદ: Built India Media: અમદાવાદ અર્બન ડેવલપમેન્ટ ઓથોરિટી (AUDA) શહેરના વિવિધ વિસ્તારોમાં 16 પ્લોટની ઈ-હરાજી યોજીને ₹1,415 કરોડથી વધુની આવક મેળવવાની તૈયારીમાં છે. હરાજીમાં થલતેજના 6, ચાંદખેડાના 7 તથા બોપલ અને ચાંદલોડિયાના 1-1 કોમર્શિયલ પ્લોટનો સમાવેશ થાય છે.

થલતેજના 7,780 ચોરસ મીટરના કોમર્શિયલ પ્લોટની બેઝ વેલ્યુ ₹202 કરોડ છે, જ્યારે તેનો બેઝ રેટ ₹2.80 લાખ પ્રતિ ચોરસ મીટર છે. AUDA અધિકારીઓને સ્પર્ધાત્મક બિડિંગથી આ પ્લોટની કિંમત આશરે ₹300 કરોડ સુધી પહોંચવાની અપેક્ષા છે. થલતેજના અન્ય 5,788 ચો.મી.ના પ્લોટની બેઝ વેલ્યુ ₹150.50 કરોડ છે.

ચાંદખેડાના 7 પ્લોટના બેઝ રેટ ₹1.19 લાખથી ₹1.90 લાખ પ્રતિ ચોરસ મીટર વચ્ચે છે અને તેમની બેઝ વેલ્યુ ₹18 કરોડથી ₹64 કરોડ સુધી છે. બોપલના 4,104 ચો.મી.ના પ્લોટની બેઝ વેલ્યુ આશરે ₹46 કરોડ અને ચાંદલોડિયાના 1,197 ચો.મી.ના પ્લોટની વેલ્યુ ₹22.86 કરોડ છે.

હરાજીનો સૌથી મોટો પ્લોટ કઠવાડામાં 73,428 ચોરસ મીટરનો ટાઉનશિપ ડેવલપમેન્ટ માટેનો પ્લોટ છે. ₹65,000 પ્રતિ ચોરસ મીટરના બેઝ રેટ સાથે તેની બેઝ વેલ્યુ આશરે ₹477 કરોડ છે. AUDA હરાજીમાંથી મળેલી આવકનો ઉપયોગ રસ્તા, બ્રિજ સહિતના વિકાસકાર્યો માટે કરશે અને ભંડોળના અભાવે અટકેલા પ્રોજેક્ટોને ફરી શરૂ કરવામાં પણ આવકનો ઉપયોગ કરવામાં આવશે. ટેન્ડર નોટિસ મુજબ જરૂરી દસ્તાવેજો જમા કરાવવાની અંતિમ તારીખ 13 ઓક્ટોબર છે.

ટીમ બિલ્ટ ઈન્ડિયા | સૌજન્ય: દેશગુજરાત