નરોડા પાટિયા ફ્લાયઓવરમાં એક વર્ષનો વિલંબ, કોન્ટ્રાક્ટરને માત્ર ₹50 લાખનો દંડ
અમદાવાદ: શહેરનો સૌથી લાંબો 2.5 કિમીનો નરોડા પાટિયા ફ્લાયઓવર પ્રોજેક્ટ એક વર્ષ મોડો ચાલી રહ્યો છે. જુલાઈ 2026 સુધીમાં કામ પૂર્ણ થવાનું હતું, પરંતુ હવે નવી સમયમર્યાદા જૂન 2027 રાખવામાં આવી છે.
ફ્લાયઓવરની અંદાજિત કિંમત ₹220 કરોડ છે. નિયમ મુજબ વિલંબ બદલ દરરોજ 0.05%થી 0.1% સુધી દંડ થઈ શકે છે, એટલે દંડની રકમ કરોડોમાં પહોંચી શકે છે. છતાં AMCએ કોન્ટ્રાક્ટર પર માત્ર ₹50 લાખનો દંડ ફટકારતા સવાલો ઊભા થયા છે.
AMCની રોડ્સ એન્ડ બિલ્ડિંગ્સ કમિટીના ચેરમેન જૈનિક વકીલે કામનો ઓર્ડર, GFC ડ્રોઇંગ, ડિઝાઇન અને સાઇટ ક્લિયરન્સમાં થયેલા વિલંબ અંગે જવાબ અને સ્પષ્ટતા માંગતી ચિઠ્ઠી ડેપ્યુટી મ્યુનિસિપલ કમિશનરને લખી છે.
પ્રોજેક્ટમાં વિલંબ માટે કોન્ટ્રાક્ટર ઉપરાંત ડિઝાઇન અને મંજૂરી સંબંધિત કારણો પણ દર્શાવવામાં આવ્યા છે. ₹50 લાખનો દંડ કઈ જોગવાઈ હેઠળ નક્કી કરાયો અને સમયમર્યાદામાં વધારો આપવા માટે જરૂરી મંજૂરી લેવામાં આવી હતી કે નહીં તે અંગે પણ સ્પષ્ટતા માંગવામાં આવી છે.
ટીમ બિલ્ટ ઈન્ડિયા, સૌજન્ય- ટાઈમ્સ ઓફ ઈન્ડિયા.
