સિંધુ ભવન રોડ પર રૂ. 570 કરોડના ખર્ચે 175 મીટર ઊંચો અમદાવાદ સિટી સ્ક્વેર બનશે
અમદાવાદ: Built India Media: અમદાવાદના સિંધુ ભવન રોડ પર રૂ. 570 કરોડના ખર્ચે 175 મીટર ઊંચો અમદાવાદ સિટી સ્ક્વેર ટાવર બનાવવામાં આવશે. અગાઉ તેની ઊંચાઈ 180 મીટર રાખવાનું આયોજન હતું, પરંતુ છેલ્લા દસ વર્ષના પવનની ગતિના આંકડા અને જમીન પરીક્ષણના આધારે તેમાં 5 મીટરનો ઘટાડો કરવામાં આવ્યો છે. અમદાવાદ મ્યુનિસિપલ કોર્પોરેશન (AMC) દ્વારા આ પ્રોજેક્ટ માટે ટેન્ડર બહાર પાડવામાં આવ્યું છે. પ્રોજેક્ટ પૂર્ણ કરવાની સમયમર્યાદા 42 મહિના નક્કી કરવામાં આવી છે.
આ પ્રોજેક્ટ ઓક્સિજન પાર્ક નજીક બે પ્લોટમાં આશરે 13,144.4 ચોરસ મીટર વિસ્તારમાં વિકસાવવામાં આવશે. ટાવરમાં ત્રણ બેઝમેન્ટ બનાવવામાં આવશે, જેની ઊંડાઈ જમીનથી આશરે 15 મીટર રહેશે. નીચેના ગ્રાઉન્ડ લેવલ પર દુકાનો અને આર્ટ ગેલેરી બનાવવાનું આયોજન છે.ઉપરના ગ્રાઉન્ડ લેવલ પર અર્બન પ્લાઝા વિકસાવવામાં આવશે, જેમાં 310 બેઠકની ક્ષમતાવાળું એમ્ફીથિયેટર, ગાર્ડન, ફૂડ કોર્ટ, ચારેય ખૂણે ફૂડ કિઓસ્ક, બેઠક વ્યવસ્થા અને ફાઉન્ટેન જેવી સુવિધાઓ હશે.
ટાવરની ટોચ પર 175 મીટરની ઊંચાઈએ સ્કાય ડેક અને સ્કાય વૉક બનાવવામાં આવશે. આ પ્રોજેક્ટ અમદાવાદના શહેરી વિકાસમાં એક આઇકોનિક સ્થળ તરીકે ઊભરી આવશે, જ્યાં વ્યાપારી, સામાજિક અને સાંસ્કૃતિક પ્રવૃત્તિઓ માટે આધુનિક સુવિધાઓ ઉપલબ્ધ થશે.
ટીમ બિલ્ટ ઈન્ડિયા | સૌજન્ય: ટાઈમ્સ ઑફ ઈન્ડિયા
