સુરત: Built India Media: સુરત મહાનગરપાલિકા (SMC) શહેરમાં મીઠી ખાડીના વારંવાર થતા પૂરને અટકાવવા માટે 13 કિલોમીટરના પટ્ટામાં ગાદ કાઢવાનું આયોજન કરી રહી છે. આ કામ માટે અંદાજે ₹30થી ₹31 કરોડનું ટેન્ડર આગામી એક-બે દિવસમાં બહાર પાડવામાં આવે તેવી શક્યતા છે.
આ કામગીરીમાં ખાડીમાંથી 3થી 4 ફૂટ ઊંડાઈ સુધીની ગાદ કાઢવામાં આવશે. ગાદ કાઢવા માટે અંદાજે ₹24.82 કરોડનો ખર્ચ થશે, જ્યારે તેના પરિવહન અને નિકાલ સહિત કુલ ખર્ચ ₹30થી ₹31 કરોડ સુધી પહોંચશે. ગાદના નિકાલ માટે શહેરની બહાર સ્થળ પણ નક્કી કરવામાં આવ્યું છે.
મીઠી ખાડીમાં દર એકથી બે વર્ષે પાણી ભરાવાની સમસ્યા સર્જાતી હોવાને કારણે આ કામગીરી હાથ ધરવામાં આવી રહી છે. મહાનગરપાલિકા લાંબા ગાળાના કાયમી ઉકેલ માટે પણ આયોજન કરી રહી છે.
આ ઉપરાંત, ખાડીમાં પૂર નિયંત્રણ માટે તૈયાર કરાયેલા વિગતવાર પ્રોજેક્ટ રિપોર્ટ (DPR)ની ચકાસણી કરવા વિશેષ સમિતિ બનાવવામાં આવી છે. સમિતિ સ્થળની વાસ્તવિક સ્થિતિ, માપણી અને નકશાની રિપોર્ટ સાથે સરખામણી કરીને જરૂરી સુધારા સૂચવશે.
ટીમ બિલ્ટ ઈન્ડિયા | સૌજન્ય: દેશગુજરાત
