સુરતને સાત માળખાકીય પ્રોજેક્ટ માટે ₹566 કરોડની ગ્રાન્ટ મંજૂર
સુરત: Built India Media: સુરત મહાનગરપાલિકા (SMC)ને સાત મહત્ત્વપૂર્ણ માળખાકીય પ્રોજેક્ટ માટે કેન્દ્ર સરકાર તરફથી ₹566 કરોડની ગ્રાન્ટ મંજૂર થઈ છે. આમાંથી ₹373.56 કરોડનો પ્રથમ હપ્તો મળી ચૂક્યો છે. ગુજરાતની આઠ મહાનગરપાલિકાઓમાં સુરતને સૌથી વધુ ગ્રાન્ટ ફાળવવામાં આવી છે.
સૌથી વધુ ₹350 કરોડ મજૂરા-ખટોદરા વિસ્તારમાં આધુનિક બહુમાળી ઓફિસ બિલ્ડિંગ માટે ફાળવાયા છે. તાપી નદી પર રૂંધ-ભાડા નજીક બેરેજ અને ફ્લાયઓવર માટે ₹100 કરોડ, જ્યારે SMIMER કેમ્પસમાં 600થી વધુ દર્દીઓની ક્ષમતા ધરાવતી નવી હોસ્પિટલ અને શૈક્ષણિક બિલ્ડિંગ માટે ₹50 કરોડ મંજૂર થયા છે.
આ ઉપરાંત, ક્રીકના રિમોડેલિંગ માટે ₹15 કરોડ, રત્નમાલા અને ગજેરા જંક્શન પાસે ફ્લાયઓવર માટે ₹16 કરોડ તથા સચિન-કનકપુર વિસ્તારમાં નવી પાણી વિતરણ લાઇન માટે ₹20 કરોડ ફાળવાયા છે. વરાછા ઝોનનાં ભાડા અને લસકાણા ગામોમાં 24 કલાક પાણી પુરવઠા માટે પણ ₹15 કરોડની જોગવાઈ કરાઈ છે.
કેન્દ્રની 2026-27ની મૂડીરોકાણ માટેની વિશેષ સહાય યોજના હેઠળ ગુજરાતની આઠ મહાનગરપાલિકાઓને કુલ ₹1,685.75 કરોડની ગ્રાન્ટ મંજૂર થઈ છે. આ ભંડોળથી શહેરમાં આરોગ્ય, પાણી પુરવઠો, માર્ગ જોડાણ અને વહીવટી માળખાને મજબૂત બનાવવાની અપેક્ષા છે.
ટીમ બિલ્ટ ઈન્ડિયા | સૌજન્ય: દેશગુજરાત
