135D નોટીસમાં સુધારો, 30 દિવસની જગ્યા 7 દિવસનો કર્યો સમયગાળો, કેટલીક શરતોમાં જ 7 દિવસ, નહિતર, 1 દિવસમાં જ પાકી એન્ટ્રી.

ગુજરાત સરકારે જમીન આવક પ્રણાલીમાં મહત્વપૂર્ણ સુધારો કરતા Gujarat Land Revenue Act, 1879 ની કલમ 135-ડીમાં ફેરફાર કર્યા છે. જેનો ઉદ્દેશ પ્રોપર્ટી ટ્રાન્ઝેક્શન સરળ બનાવવાનો અને પારદર્શિતા વધારવાનો છે.

રાજ્યના પ્રવક્તા મંત્રી જીતું વાઘાણીએ આ નિર્ણયની જાહેરાત કરતાં જણાવ્યું હતું કે, આવક વ્યવસ્થા સરળ બનાવવાના વ્યાપક પ્રયાસોના ભાગરૂપે કલમ 135-ડીમાં મહત્વપૂર્ણ સુધારા કરવામાં આવ્યા છે. હવે કાયદેસર જમીન અને મિલકતના વ્યવહારોમાં નાગરિકોને ફરજિયાત 30 દિવસની નોટિસ માટે રાહ જોવાની જરૂર રહેશે નહીં.

વાઘાણીએ જણાવ્યું હતું કે અગાઉની જોગવાઈને કારણે વિવાદ રહિત કેસોમાં પણ ખરીદદારો અને વેચાણકારોને 30 દિવસ રાહ જોવી પડતી હતી. આ સમયગાળાનો દુરુપયોગ કરીને કેટલાક તત્વો ખોટા વાંધા ઉઠાવી પૈસા વસૂલતા હતા. આ પરિસ્થિતિને ધ્યાનમાં રાખીને રાજ્ય સરકારે ચોક્કસ કેટેગરીમાં ફરજિયાત નોટિસની જોગવાઈ દૂર કરી છે. જેનાથી ખેડૂતો અને મધ્યમ વર્ગને સીધો લાભ મળશે.

સુધારેલા નિયમો મુજબ નીચેની શરતો પૂર્ણ થાય.તો 135-ડી નોટિસ વિના જ એન્ટ્રી તે જ દિવસે નોંધાઈ જશે.

• જમીનના રેકોર્ડમાં છેલ્લા એક વર્ષથી કોઈ ફેરફાર ન થયો હોય.
• જમીન પર કોઈ વિવાદ કે દાવો બાકી ન હોય.
• જમીનનો કબ્જો શાંતિપૂર્ણ હોય.
• 7/12 ઉતારામાં નોંધાયેલા તમામ હકદારોએ સેલ ડીડ પર સહી કરી હોય.

આવા કેસોમાં એન્ટ્રીને તરત જ ‘પાકી એન્ટ્રી’ તરીકે પ્રમાણિત કરવામાં આવશે, જેથી પ્રક્રિયાત્મક વિલંબ ટળશે. આ ઉપરાંત, સક્ષમ અદાલતો અથવા ટ્રિબ્યુનલ દ્વારા આપવામાં આવેલા આદેશો હવે સીધા જ અમલમાં મૂકવામાં આવશે અને તેમાં 135-ડી નોટીસ આપવાની જરૂર રહેશે નહીં, જેના કારણે પ્રક્રિયા વધુ ઝડપી બનશે.

જ્યાં તપાસ જરૂરી હોય તેવા કેસોમાં—જેમ કે છેલ્લા એક વર્ષમાં ફેરફાર થયેલા રેકોર્ડ, પાવર ઓફ એટર્ની (PoA) દ્વારા થયેલા વ્યવહારો, તમામ હકદારોની સહી ન હોવી અથવા વિવાદિત કેસ—નોટિસ સમયગાળો 30 દિવસમાંથી ઘટાડીને માત્ર 7 દિવસ કરવામાં આવ્યો છે. આ દરમિયાન વાસ્તવિક દાવેદારો પુરાવા રજૂ કરી શકશે.

વાઘાણીએ વધુમાં ઉમેર્યું હતું કે આ સુધારા માત્ર કૃષિ જમીનધારકોને જ નહીં પરંતુ દુકાન, ફ્લેટ અને રહેણાંક મિલકત ખરીદનાર નાગરિકોને પણ લાભ આપશે. સીધી વંશ પરંપરામાં થતી મિલકતના વહેચાણને પણ સરળ બનાવશે અને અનાવશ્યક કાનૂની જટિલતાઓ ઘટાડશે.

તેમણે વધુમાં જણાવ્યું કે મામલતદારથી લઈને SSRD સુધીની આવક અદાલતોમાં લંબિત રહેલા અનેક કેસોમાં મુખ્ય વિલંબનું કારણ 135-ડી હેઠળના વાંધા હતા. જે હવે ઝડપથી ઉકેલાશે. આ સુધારા સાથે ખોટા દાવા અને બ્લેક મેલિંગ જેવી પ્રવૃત્તિઓ પર પણ નિયંત્રણ આવશે.

સરકારનો વિશ્વાસ છે કે આ સુધારો વિવાદો ઘટાડશે, કાર્યક્ષમતા વધારશે અને ખરીદદારો-વેચાણકારોમાં વિશ્વાસ વધારશે, જેથી તેઓ નિર્ભયતાથી વ્યવહાર કરી શકે.

ગુજરાત સરકાર દ્વારા અમલમાં મૂકાયેલા આ મહત્વપૂર્ણ અને પ્રગતિશીલ મહેસૂલ સુધારાઓનું સ્વાગત કરતાં ક્રેડાઈ ગુજરાતના પ્રેસિડેન્ટ તેજશ જોશીએ જણાવ્યું હતું કે, આ નિર્ણયથી જમીનના લેવડ-દેવડની પ્રક્રિયા વધુ સરળ, ઝડપી અને પારદર્શક બનશે. રિયલ એસ્ટેટ ક્ષેત્રમાં વિશ્વાસ મજબૂત બનશે.

રોકાણકારો અને ઘરખરીદદારો માટે સુરક્ષિત તથા સ્પષ્ટ માલિકી સુલભ બનશે. તેમજ બજારમાં લિક્વિડિટી સુધારવા અને પ્રોજેક્ટ્સના અમલીકરણને ઝડપી બનાવવામાં મદદ મળશે. આ પ્રકારના નીતિગત સુધારા ગુજરાતના આયોજનબદ્ધ શહેરી વિકાસ, ઔદ્યોગિક વૃદ્ધિ અને લાંબા ગાળાના ઈન્ફ્રાસ્ટ્રક્ચર વિકાસને મજબૂત આધાર આપશે.

ટીમ બિલ્ટ ઈન્ડિયા.