Olympicની તૈયારીઓ, મણિપુર-ગોધાવી ખાતે 200 એકર જમીન પર તૈયાર કરાશે ઓલિમ્પિક વિલેજ

વર્ષ 2036માં ઓલિમ્પિકનું આયોજન અમદાવાદમાં થાય તે આશા સાથે સરકાર દ્વારા તૈયારીઓ શરુ કરી દેવામાં આવી છે. બોપલ પાસે આવેલા મણિપુર-ગોધાવી ખાતે 200 એકર જમીનમાં ઓલિમ્પિક વિલેજ તેમજ ટ્રેનિંગ સેન્ટર્સ શરુ કરવાની યોજના AUDA ધ્વારા તૈયાર કરવામાં આવી છે. ખેલાડીઓ માટે લગભગ 3000 અપાર્ટમેન્ટ તૈયાર કરવામાં આવશે. આ સિવાય જીમ અને પાર્કિંગની પણ પૂરતી વ્યવસ્થા હશે.

અમદાવાદ અને તેની આસપાસના વિસ્તારમાં સ્પોર્ટ્સને લગતી સુવિધાઓ ઉભી કરવા માટેના સરકારના મહત્વાકાંક્ષી પ્રોજેક્ટના ભાગ રૂપે, Ahmedabad Urban Development Authority(AUDA) દ્વારા શહેરના બોપલ વિસ્તાર પાસે આવેલા મણિપુર-ગોધાવી ખાતે 200 એકર જમીનમાં ઓલિમ્પિક વિલેજ અને ટ્રેનિંગ સેન્ટર્સ શરુ કરવાની યોજના તૈયાર કરવામાં આવી છે. ઉલ્લેખનીય છે કે સરકારનો આ પ્રોજેક્ટ લગભગ 4119 કરોડ રુપિયાનો છે. એવી આશા સાથે તૈયારી કરવામાં આવી રહી છે કે વર્ષ 2036માં ઓલિમ્પિકનું આયોજન અમદાવાદમાં કરવામાં આવે.

સૂત્રો દ્વારા પ્રાપ્ત જાણકારી અનુસાર, અગાઉ સરકાર તરફથી નરેન્દ્ર મોદી ક્રિકેટ સ્ટેડિયમના પરિસરમાં જ ગેમ્સ વિલેજ અને ખેલાડીઓ માટે અપાર્ટમેન્ટ બનાવવાની યોજના તૈયાર કરવામાં આવી હતી. પરંતુ મોટેરા-કોટેશ્વર તેમજ સાબરમતી વિસ્તારમાં ટીપી સ્કીમમાં ફેરફાર થવાને કારણે પ્લોટના માલિકો સાથે વાતચીત કરવામાં સમય લાગી શકે છે. માટે તંત્ર દ્વારા નક્કી કરવામાં આવ્યું છે કે, મણિપુર-ગોધાવી ખાતે આ ઓલિમ્પિક વિલેજ તૈયાર કરવામાં આવે.

AUDAના સૂત્રોએ જણાવ્યું કે, વધારાના કોઈ પણ ખર્ચા વગર જમીનો મેળવવા માટે તંત્રએ ટાઈન પ્લાનિંગના નિયમો અનુસાર કપાત વિસ્તારો પસંદ કર્યા છે. મણિપુર- ગોધાવી વિસ્તારમાં લગભગ 400 હેક્ટર જમીનની વિવિધ ટીવી સ્કીમ તંત્ર દ્વારા નક્કી કરવામાં આવી છે. તમને જણાવી દઈએ કે સરકાર દ્વારા લગભગ 200 એકર જમીનનો ઉપયોગ અપાર્ટમેન્ટ, જીમ તેમજ ખેલાડીઓ માટે ટ્રેનિંગની સુવિધાઓ ઉભી કરવા માટે કરવામાં આવશે.

નામ જાહેર ન કરવાની શરતે AUDAના એક અધિકારીએ જણાવ્યું કે, ટીપી સ્કીમ 429 તેમજ તેની આસપાસની જમીન સહિતની 400 હેક્ટર જમીન પર અમે ડેવલપમેન્ટ પ્લાન્સ ઈશ્યુ કરવાનું બંધ કરી દીધું છે. સ્પોર્ટ્સ વિલેજ તૈયાર થઈ શકે તે માટે અમે આ નિર્ણય લીધો છે. રાજ્ય સરકારની યોજના એવી છે કે ઓલિમ્પિક્સ સમાપ્ત થઈ જાય પછી ખેલાડીઓ માટે તૈયાર કરવામાં આવેલા આ અપાર્ટમેન્ટને વેચી દેવામાં આવશે. એક અંદાજ અનુસાર દેશ-વિદેશના કુલ 12,500 મહેમાનો તેમાં ભાગ લેશે.

ગેમ્સ વિલેજની વાત કરીએ તો, લગભગ 7500 કાર અને 15,000 દ્વિચક્રી વાહનોને સમાવી શકે તેવા પાર્કિંગની વ્યવસ્થા અહીં કરવામાં આવશે. એક વર્ષ પહેલા સરકાર તરફથી આ 4118 કરોડના પ્રોજેક્ટ માટે SPV(સ્પેશિયલ પર્પઝ વ્હીકલ)ની યોજના ઘડવામાં આવી હતી. આ SPV સ્પોર્ટ્સ ઓથોરિટી ઓફ ઈન્ડિયા(SAI) અને AUDA વચ્ચે હશે. પ્રાથમિક યોજના એવી હતી કે મોટેરામાં ગેમ્સ વિલેજ ખાતે 2થી લઈને 4 બેડરુમના 3000 અપાર્ટમેન્ટ તૈયાર કરવામાં આવશે. પરંતુ સૂત્રોના જણાવ્યા અનુસાર, આમાંથી મોટાભાગના અપાર્ટમેન્ટને હવે મણિપુર-ગોધાવી ખાતે શિફ્ટ કરવામાં આવશે.

ટીમ બિલ્ટ ઈન્ડિયા, સૌજન્ય- આઈ એમ ગુજરાત.