વડાપ્રધાન મોદી 30-31 ઑક્ટોબરે ગુજરાતની મુલાકાતે, રૂ. 14,000 કરોડથી વધુનાં વિકાસકાર્યોનું લોકાર્પણ
ગાંધીનગર: Built India Media: વડાપ્રધાન નરેન્દ્ર મોદી 30 અને 31 ઑક્ટોબર, 2026ના રોજ ગુજરાતની મુલાકાતે આવશે. આ દરમિયાન બનાસકાંઠામાં રૂ. 14,000 કરોડથી વધુનાં વિકાસકાર્યોનું ખાતમુહૂર્ત, લોકાર્પણ અને રાષ્ટ્રને સમર્પણ કરશે. તેઓ પીએમ-કિસાન યોજનાનો 24મો હપ્તો પણ જાહેર કરશે, જે અંતર્ગત દેશના ખેડૂતોને રૂ. 19,000 કરોડની નાણાકીય સહાય આપવામાં આવશે.
બનાસકાંઠામાં વડાપ્રધાન ભીલડી ખાતે ભારત બોવાઇન બ્રીડિંગ એન્ડ રિસર્ચ સેન્ટર (BBBRC) રાષ્ટ્રને સમર્પિત કરશે. આ ઉપરાંત થરાદ અને રાધનપુરમાં બનાસ ડેરીના બે બાયો-CNG પ્લાન્ટનું ખાતમુહૂર્ત, બટાકા પ્રોસેસિંગ પ્લાન્ટના વિસ્તરણનું ઉદ્ઘાટન અને બે નવી ટ્રેન સેવાઓને લીલી ઝંડી આપશે.
અમદાવાદમાં મેટ્રો ફેઝ-2A (એરપોર્ટ એક્સ્ટેન્શન) અને ફેઝ-2B (ગિફ્ટ સિટી એક્સ્ટેન્શન)નું ખાતમુહૂર્ત કરવામાં આવશે. સાથે જ અમદાવાદ-મહેસાણા સ્ટેટ હાઇવે-41ને ચારથી આઠ લેનમાં અપગ્રેડ કરવા માટે આશરે રૂ. 2,600 કરોડના પ્રોજેક્ટની શરૂઆત થશે. ગુજરાતમાં 4,030 નવા બાળમૈત્રી આંગણવાડી કેન્દ્રોનું ખાતમુહૂર્ત અને પૂર્ણ થયેલા 361 કેન્દ્રોનું ઉદ્ઘાટન પણ કરવામાં આવશે.
30 ઑક્ટોબરે એકતા નગર ખાતે ભારત પર્વ-2026નું ઉદ્ઘાટન, એકતા પ્રકાશ પર્વ અને નર્મદા આરતીમાં વડાપ્રધાન ભાગ લેશે. 31 ઑક્ટોબરે સરદાર વલ્લભભાઈ પટેલની 151મી જન્મજયંતિ નિમિત્તે સ્ટેચ્યુ ઑફ યુનિટી ખાતે પુષ્પાંજલિ અર્પણ કરીને રાષ્ટ્રીય એકતા દિવસની ઉજવણીમાં ભાગ લેશે. આ દરમિયાન એકતા નગરમાં રૂ. 400 કરોડથી વધુનાં વિકાસકાર્યોનું લોકાર્પણ, ખાતમુહૂર્ત અને રાષ્ટ્રને સમર્પણ કરવામાં આવશે. તેમાં IRCTC હોટેલ, પાણી અને ગટર શુદ્ધિકરણ પ્લાન્ટ, નર્મદા ઘાટનું અપગ્રેડેશન તથા ઇકો-ટૂરિઝમ સંબંધિત પ્રોજેક્ટ્સનો સમાવેશ થાય છે.
ટીમ બિલ્ટ ઈન્ડિયા | સૌજન્ય: દેશગુજરાત
