PM મોદીના વતન વડનગર નજીક બનશે દેશની સૌથી ઊંચી અવકાશ વેધશાળા, અંદાજિત ₹1,041 કરોડના ખર્ચે આકાર પામશે

ગુજરાત સરકારે ધરોઈ ડેમ અને તેની આસપાસના વિસ્તારના વિકાસ માટે ‘વર્લ્ડક્લાસ સસ્ટેઈનેબલ ટૂરિઝમ/પિલગ્રીમેજ’ પ્રોજેક્ટને સૈદ્ધાંતિક મંજૂરી આપી છે. ધરોઈમાં બનનારું 140 મીટર ઊંચાઈનું ટાવર ભારતની સૌથી ઊંચી અવકાશ વેધશાળા હશે. ધરોઈ ડેમ પ્રોજેક્ટની સાથે વડનગર હેરિટેજ અને કલ્ચરલ ટુરિઝમ, અંબાજી યાત્રાધામના પ્રવાસનને વેગ મળે તે માટે ટુરિઝમ સર્કીટ તૈયાર કરાશે. જેનો લાભ રાજ્ય ઉપરાંત દેશ અને વિદેશના પ્રવાસીઓ લઈ શકશે.

• અંદાજિત 1041 કરોડ રૂપિયાના ખર્ચે ધરોઈ ડેમ પ્રોજેક્ટ સાકાર થશે.
• આ પ્રોજેક્ટને મુખ્યમંત્રી કાર્યાલય તરફથી મંજૂરી મળ્યા બાદ PMO ખાતે મંજૂરી માટે મોકલાયો છે.
• પીએમ મોદીએ આ પ્રોજેક્ટની પરિકલ્પના કરી છે ત્યારે જલ્દી જ કાગળ પરથી ઊતરીને હકીકત બનશે.

નર્મદા ડેમ નજીક વિશ્વની સૌથી ઊંચી પ્રતિમા સ્ટેચ્યૂ ઓફ યુનિટી (Statue of Unity) બાદ આધુનિક દુનિયાની વધુ એક વર્લ્ડક્લાસ અજાયબી ઉત્તર ગુજરાતમાં ધરોઈ ડેમ (Dharoi Dam) પાસે આકાર લેશે. વડાપ્રધાન નરેન્દ્ર મોદીના સૂચન બાદ ગુજરાત સરકારે ધરોઈ ખાતે અવકાશ વેધશાળા (Space Observatory) (ગ્રહનક્ષત્રો તથા હવામાનમાં પરિવર્તનોનું નિરીક્ષણ કરવા માટેની ઇમારત) કમ મનોરંજન માટેની ઈમારત ઊભી કરવાનો વિસ્તૃત પ્લાન તૈયાર કર્યો છે. ધરોઈ પીએમ મોદી (PM Modi)ના વતન વડનગર (Vadnagar)થી થોડા કિલોમીટર દૂર આવેલું છે.

આ પ્રોજેક્ટના પ્રસ્તાવને મંજૂરી માટે વડાપ્રધાન કાર્યાલય (PMO)માં મોકલવામાં આવ્યો છે. આ પ્રોજેક્ટ પાછળ અંદાજિત 1,041 કરોડ રૂપિયા ખર્ચાશે અને ત્રણ વર્ષમાં નિર્માણ કાર્ય પૂરું થશે.

ગુજરાત સરકારે ધરોઈ ડેમ અને તેની આસપાસના વિસ્તારના વિકાસ માટે ‘વર્લ્ડક્લાસ સસ્ટેઈનેબલ ટૂરિઝમ/પિલગ્રીમેજ’ પ્રોજેક્ટને સૈદ્ધાંતિક મંજૂરી આપી છે. ધરોઈ ડેમ પ્રોજેક્ટની સાથે વડનગર હેરિટેજ અને કલ્ચરલ ટુરિઝમ, અંબાજી યાત્રાધામના પ્રવાસનને વેગ મળે તે માટે ટુરિઝમ સર્કીટ તૈયાર કરાશે. જેનો લાભ રાજ્ય ઉપરાંત દેશ અને વિદેશના પ્રવાસીઓ લઈ શકશે.

ધરોઈમાં બનનારું 140 મીટર ઊંચાઈનું ટાવર ભારતની સૌથી ઊંચી અવકાશ વેધશાળા હશે. અહીં ટેલિસ્કોપ ગેલેરી, વ્યૂઈંગ પોઈન્ટ અને ખગોળશાસ્ત્રીય વેધશાળા હશે. ઉપરાંત ટાવરમાં ઓપન ડેક હશે જ્યાંથી નરી આંખે આકાશને નિહાળી શકાશે. સાથે જ ટાવરના ટોપ એન્ડમાં અડધો ઢાંકેલી બેઠક વ્યવસ્થા હશે અને આ જ પ્રકારનો અર્થઘટન ઝોન તૈયાર કરાશે.

આ પ્રોજેક્ટમાં વિઝિટર સેન્ટર, ઍમ્ફિથિએટર, લેસર શો, વોટર સ્પોર્ટ્સ ઝોન, આઈલેન્ડ એડવેન્ચર ઝોન સહિતની એક્ટિવિટીનો સમાવેશ કરવામાં આવ્યો છે. આ ઉપરાંત ઐતિહાસિક ધરોઈ ડેમ પ્રોજેક્ટમાં અવકાશ વેધશાળા ઉપરાંત લેસર શો સાથેનું ઍમ્ફિથિએટર, વોટર સ્પોર્ટ્સ ઝોન, આઈલેન્ડ એડવેન્ચર ઝોન, વેલનેસ અને નેચરોપથી સેન્ટર, પોલો ક્લબ, રિસોર્ટ અને ઈવેન્ટ ગ્રાઉન્ડ સાથેનું કન્વેન્શન સેન્ટર પણ હશે.

ઉચ્ચ સૂત્રો પાસેથી મળેલી જાણકારી અનુસાર, ‘મુખ્યમંત્રી કાર્યાલયમાંથી મંજૂરી મળ્યા બાદ પ્રોજેક્ટના માસ્ટર પ્લાનને અપ્રુવલ માટે વડાપ્રધાન કાર્યાલયમાં મોકલવામાં આવ્યો છે. પીએમ મોદીએ આ પ્રોજેક્ટની પરિકલ્પના કરી છે ત્યારે રાજ્ય સરકાર તેને કાગળ પરથી હકીકતમાં ઉતારવાની પ્રક્રિયા મંજૂરી બાદ શરૂ કરશે.’

સૂત્રોના કહેવા અનુસાર, રાજ્ય સરકાર વડનગરને હેરિટેજ સિટી તરીકે વિકસાવી રહી છે. અહીં મ્યૂઝિમ સહિતના આકર્ષણો હશે. ઉપરાંત વિશ્વમાં પ્રસિદ્ધ યાત્રાધામ અંબાજીની આસપાસના વિસ્તારમાં પણ વિકાસ કરવાની કવાયત હાથ ધરાઈ છે. “આ પ્રદેશમાં આવેલા બધા જ આકર્ષણો માટે ધરોઈ ડેમ સૌને જોડનારી ટુરિઝમ સાઈટ બનશે”, તેમ સૂત્રોએ ઉમેર્યું.

આ પ્રોજેક્ટ હેઠળ ધરોઈ ડેમ પર સીપ્લેન ટર્મિનલ પણ બનાવાશે. સૂત્રોનું કહેવું છે કે, ફિક્સ અને ફ્લોટિંગ જેટી પણ તૈયાર કરાશે. ઉપરાંત ટર્મિનલ એરિયામાં વેઈટિંગ ઝોન, કેફેટેરિયા સહિતની વિવિધ સુવિધાઓ પેસેન્જરોને ઉપલ્બ્ધ કરાવાશે.

ટીમ બિલ્ટ ઈન્ડિયા, સૌજન્ય- દિવ્ય ભાસ્કર.