AUDAએ Olympic District ઉભું કરવા માટે અમદાવાદમાં અહીં વિશાળ જગ્યા પસંદ કરી

Olympic District In Ahmedabad: 2036માં અમદાવાદમાં ઓલિમ્પિકનું આયોજન થઈ શકે તે માટે ટીમો દ્વારા જમીનની પસંદગીની જે તપાસ ચાલી રહી હતી તેમાં એક વિશાળ જમીનનો ટૂકડો ભાટમાં પસંદ કરવામાં આવી છે, જોકે, આ જમીન જે અલગ-અલગ વિભાગોની છે તેમની પાસેથી તેને લેવા માટે જરુરી કાર્યવાહી સહિતની કામગીરી કરવામાં આવી રહી છે.

2036નું ઓલિમ્પિક ભારતમાં થાય તે માટેની તૈયારીઓ રાજ્ય સરકાર દ્વારા આરંભી દેવામાં આવી છે. આ ઓલિમ્પિકનું આયોજન અમદાવાદની આસપાસ થાય સ્પોર્ટ્સ ફેસિલિટી ઉભી કરવા માટે કામગીરી હાથ ધરવામાં આવી છે, જેમાં અમદાવાદ અર્બન ડેવલોપમેન્ટ ઓથોરિટી (AUDA) દ્વારા ભાટ ગામ પાસે 9.5 લાખ સ્ક્વેર મીટર જમીન પસંદ કરીને તે અંગે વધુ વિચારણા કરવામાં આવી રહી છે.

TP સ્કીમ 238 અને 80માં આવતી જે જમીન જોવામાં આવી છે તે જમીન ગુજરાત ઇન્ડસ્ટ્રીયલ ડેવલપમેન્ટ કોર્પોરેશન (GIDC), સરદાર સરોવર નિગમ લિમિટેડ (SSNL) અને વન વિભાગ જેવી વિવિધ સરકારી વિભાગોની છે. હવે આ જે જમીન પર પસંદગી ઉતારવામાં આવી છે ત્યાં સ્પોર્ટ્સને લગતી જરુરી સુવિધાઓ ઉભી કરવા અંગે વિચારણા કરવામાં આવી રહી છે, જ્યાં સ્પોર્ટ પર્સનને રહેવા માટેની જગ્યા હોય અને અહીં મેચ જોવા માટે આવનારા દર્શકો રહી શકે તે માટે હોટલની વ્યવસ્થા હોય. AUDAએ બોપલ નજીક મણિપુર-ગોધાવી ખાતે 200 એકર જમીન પર ઓલિમ્પિક્સ વિલેજ અને રમત પ્રશિક્ષણ સુવિધાઓ સ્થાપવાની પ્રક્રિયામાં પણ છે.

રાજ્ય સરકારે નરેન્દ્ર મોદી ક્રિકેટ સ્ટેડિયમની નજીકમાં 236 એકર જમીન પર સરદાર પટેલ સ્પોર્ટ્સ એન્ક્લેવનું પણ આયોજન કર્યું છે. સૂત્રોએ જણાવ્યું હતું કે AUDAએ પ્રાઇસવોટરહાઉસકૂપર્સ (PwC)ને એવી જમીન ઓળખવા માટેની કામગીરી સોંપી હતી, કે જેનો ઉપયોગ ઓલિમ્પિક માટે સુવિધાઓ ઊભી કરવા માટે થઈ શકે, સંસ્થાએ તેના અહેવાલમાં અમદાવાદ અને ગાંધીનગરમાં પહેલેથી જ તૈયાર રમતગમત સુવિધાઓનો સર્વે કર્યો હતો કે ત્યાં ઓલિમ્પિક રમતો યોજવા માટે યોગ્ય છે કે નહીં. આ સંસ્થાએ જમીનની પણ ઓળખ કરી હતી જે ઓલિમ્પિક માટે ઈન્ફ્રાસ્ટ્રક્ચર સ્થાપવા માટે ઉપલબ્ધ કરાવી શકાય છે. રિપોર્ટ અનુસાર AUDAએ 9.5 લાખ ચોરસ મીટર જમીનની ઓળખ કરવામાં આવી છે.

વધુમાં આ અંગે સૂત્રોએ જણાવ્યું છે કે, AUDA ઓલિમ્પિક સેલના અધિકારીઓ જે જમીન પર પસંદગી ઉતારવામાં આવી છે તેને સંપાદિત કરવા માટે સરકારી વિભાગો સાથે વાતચીત કરી રહ્યા છે. જેમાં AUDAએ ટાઉન પ્લાનિંગ માટે કપાત કરેલી જમીનનો પણ સમાવેશ કરવા અંગે વિચારણા ચાલી રહી છે, જેથી તેનો ઓલિમ્પિક ગામ ઉભું કરવા માટે ઉપયોગ કરી શકાય.

ટીમ બિલ્ટ ઈન્ડિયા, સૌજન્ય- આઈ એમ ગુજરાત.