એફોર્ડેબલ હાઉસિંગ મામલે અમદાવાદ દેશમાં ટોચ પર

એક તરફ આરબીઆઈ સતત વ્યાજમાં વધારો કરી રહી છે તેવામાં લોકોને લક્ઝુરિયસ ઘર ખરીદવાના બજેટ પર બ્રેક લાગી રહી છે અને વધુ લોકો એફોર્ડેબલ હાઉસિંગ તરફ વળી રહ્યા છે. ત્યારે અમદાવાદ દેશના 8 મોટા શહેરોમાં એફોર્ડેબલ હાઉસિંગ મામલે ટોપ પર છે.

આરબીઆઈ દ્વારા વ્યાજ દરમાં વધારાથી અમદાવાદમાં ઘર ખરીદનારાઓના બજેટ પર અસર જોવા મળી રહી છે જોકે તેમ છતાં અમદાવાદ હજુ પણ ભારતના આઠ મોટા શહેરોમાં સૌથી વધુ એફોર્ડેબલ હાઉસિંગ માર્કેટ ધરાવે છે. નાઈટ ફ્રેન્ક ઈન્ડિયાના અહેવાલ ‘એચ1 2022 માટે એફોર્ડેબિલિટી ઈન્ડેક્સ’ અનુસાર અમદાવાદનો 22%નો એફોર્ડેબિલિટી સ્કોર હતો. રિપોર્ટમાં જણાવાયું છે કે રેપો રેટમાં 90bpsના વધારાના પરિણામે ઊંચા હોમ લોનના વ્યાજ દરને કારણે તમામ બજારોમાં ઘર ખરીદનારાઓના બજેટમાં ઘટાડો જોવા મળ્યો હતો. 2022ના પ્રથમ અર્ધવાર્ષિક ગાળામાં અમદાવાદ પછી પુણે અને ચેન્નાઈ બંને 26% પર છે.

દેશના 8 મોટા શહેરોમાં એફોર્ડેબિલિટી રેટમાં અમદાવાદ મોખરે
નાઈટ ફ્રેન્કનો પ્રોપરાઈટરી એફોર્ડેબિલિટી ઈન્ડેક્સ, જે EMI અને આવકના રેશિયોને ટ્રૅક કરે છે. જેમાં ભારતના આઠ સૌથી મોટા શહેરોમાં 2010 થી 2021 સુધી સતત સુધારો થયો છે. ખાસ કરીને મહામરી દરમિયાન, જ્યારે ભારતીય રિઝર્વ બેંક (RBI)એ રેપો રેટને દશકના નીચલા સ્તર સુધી ઘટાડ્યો હતો. જો કે, પાછલા બે રિવિઝનમાં આરબીઆઈ દ્વારા રેપો રેટમાં કરવામાં આવેલા 90bps વધારાને કારણે સમગ્ર બજારોમાં હોમ એફોર્ડેબિલિટીમાં સરેરાશ 2%નો ઘટાડો થયો છે અને EMI લોડમાં 6.97% વધારો થયો છે, એમ અહેવાલમાં જણાવાયું છે.

2019થી સતત ટોપ પર છે અમદાવાદ
“હાઉસિંગ મામલે અમદાવાદ 2019 થી સતત ભારતમાં સૌથી વધુ એફોર્ડેબલ શહેર રહ્યું છે. 2010 માં 46% થી 2019 માં એફોર્ડેબિલિટી સુધરી 25% થઈ. 2020 ની શરૂઆતમાં મહામારીના આગમન સાથે 2020 માં એફોર્ડેબિલિટી વધીને 24% અને 2021 માં 20% થઈ ગઈ. 2022 ના પ્રથમ અર્ધવાર્ષિક ગાળામાં શહેરનો એફોર્ડેબિલિટીનો સ્કોર 22% હતો.” અહેવાલમાં જણાવાયું હતું.

જોકે ભવિષ્યમાં આરબીઆઈ હજુ પણ વ્યાજ દર વધારી શકે છે
નાઈટ ફ્રેન્ક ઈન્ડિયાના ડિરેક્ટર (રિસર્ચ) વિવેક રાઠીએ જણાવ્યું હતું કે, “વ્યાજ દરમાં વધારો અને મોંઘા મકાનોએ લોકોના ખરીદીના બજેટને અસર કરી છે, પરંતુ અમદાવાદમાં હજુ પણ ઘરની માસિક આવકના 22% જેટલા EMI સાથે ઘર ખરીદી શકાય છે. અમારે આગામી મોનેટરી પોલિસી પર ધ્યાન આપવું પડશે કારણ કે આરબીઆઈ હજુ પણ આગળ વ્યાજ દરમાં વધુ વધારો કરે તેવી શક્યતા છે.

ટીમ બિલ્ટ ઈન્ડિયા, સૌજન્ય- આઈ એમ ગુજરાત.