પાવાગઢમાં શક્તિપીઠ મહાકાળીના મંદિરનો 121 કરોડમાં કરાયો જીણોદ્ધાર, વડાપ્રધાન નરેન્દ્ર મોદીએ કર્યું ઉદ્ઘાટન

વડાપ્રધાન મોદીએ મદિરના નવા નિર્માણનું ઉદ્ઘાટન કર્યું છે અને તેમણે જણાવ્યું કે, વર્ષો પછી પાવાગઢમાં મહાકાળીના ચરણોમાં થોડો સમય વિતાવવાની તક મળી, આ મારા જીવનની સૌથી સારી પળ છે. સંકલ્પ જ્યારે સિદ્ધિ બને ત્યારે તેની કલ્પના શું હોય છે તેનો આનંદ અનેરો હોય છે. પાંચ સદી પછી આઝાદીના 75 વર્ષ પૂર્ણ થયા પછી પણ મહાકાળીના શિખર પર ધજા નહોતી ફરકી. આ પલ અમને પ્રેરણા આપે છે, ઉર્જા આપે છે. અને મહાન પરંપરા પ્રમાણે જીવવા માટે પ્રેરિક કરે છે.

ગુપ્ત નવરાત્રી શરુ થઈ રહી છે, તે પહેલા મહાકાળી મંદિરમાં ભવ્ય અને દિવ્ય સ્વરૂપમાં આપણી સામે છે. શક્તિ અને સાધનાની આ જ વિશેષતા હોય છે. ગુપ્ત નવરાત્રી છે, પણ શક્તિ ક્યારેય લૂપ્ત નથી થતી.

આ મંદિર આપણા મસ્તકને ઊંચું કરે છે, સદીઓ પછી પાવાગઢ મંદિર પર ધ્વજારોહણ થયું છે. આ માત્ર આસ્થા અને આધ્યાત્મનું પ્રતિક નથી, પરંતુ તે એ પણ જણાવે છે કે સદીઓ બદલાય છે પણ આસ્થાનું શિખર કાયમ રહે છે. અયોધ્યામાં ભવ્ય રામ મંદિર આકાર લઈ રહ્યું છે.

મૂળ મંદિરને યથાવત રાખીને આસપાસના વિસ્તારનો વિકાસ કરવામાં આવ્યો છે તે અંગે વાત કરતા તેમણે જણાવ્યું કે, હવે મોટી સંખ્યામાં એક સાથે દર્શન અને આરતી કરી શકશે. આ સાથે પાવાગઢ ચઢવા માટેના પગથિયા પણ પહોળા અને વધારે અનુકૂળ બનાવવામાં આવ્યા હોવાનું વડાપ્રધાન મોદીએ જણાવ્યું હતું. આ સાથે અહીંના પ્રખ્યાત દુધિયા તળાવનો પણ વિકાસ કરવામાં આવશે. રોપ-વે દ્વારા પાવાગઢની સુંદરતાને માણવા મળતી હોવાનું પણ વડાપ્રધાન મોદીએ જણાવ્યું હતું.

જણાવી દઈએ કે, પાવાગઢમાં 121 કરોડ રૂપિયાના ખર્ચે મંદિર પરિસરનો જીર્ણોદ્ધાર કરાયો છે અને શિખરનું નિર્માણ કરાયું છે. શિખર ન હોવાના કારણે મંદિરને સદીઓથી મંદિર પર ધજા ચડાવી શકાતી ન હતી. જોકે, હવે લગભગ 500 વર્ષ પછી મંદિર પર ફરીથી ધજા લહેરાશે. મંદિર આસપાસ બનાવાયેલો કોરિડોર 2 હજાર જેટલા શ્રદ્ધાળુઓ ઊભા રહી શકે તેટલો પહોળો છે. સાથે મંદિર સુધી પહોંચવા માટેની સીડીઓ પણ પહોળી કરી દેવામાં આવી છે. 15મી સદીમાં મોહમ્મદ બેગડાએ પાવાગઢ પર ચડાઈ કરી ત્યારે તેણે મંદિરમાં તોડફોડ કરી શિખરને નુકસાન પહોંચાડ્યું હતું અને ત્યાં એક દરગાહ બનાવી દીધી હતી. જેના કારણે મંદિર પર ધજા ચડાવી શકાતી ન હતી. જોકે, હવે આ દરગાહનો પ્રશ્ન ઉકેલાઈ ગયો છે.

પાવાગઢના દર્શન પછી વડાપ્રધાન મોદી વડોદરાથી વિવિધ લોકાર્પણ અને ખાતમૂહુર્ત પણ કરવાના છે. વડોદરાથી પાછા અમદાવાદ પાછા આવીને વડાપ્રધાન વિવિધ નિર્ધારિત કાર્યક્રમોમાં હાજરી આપીને દિલ્હી જવા માટે રવાના થશે.

ટીમ બિલ્ટ ઈન્ડિયા, સૌજન્ય- આઈ એમ ગુજરાત.